میرے کئی اساتذہ نے، کم از کم تین نے، مجھے مایوس کیا تھا۔ یہ وہ لوگ تھے جن کی میں قدر کرتی تھی، جنہیں میں نے اپنا رہنما مان لیا تھا۔ اس مایوسی نے اندر ایک بڑا سا خلا چھوڑ دیا تھا، اور بہت سے سوال بھی۔ فی الحال ان میں سے صرف تین لکھ رہی ہوں۔
۱۔ یہ کیسے ممکن ہے کہ آپ دن بھر دین پڑھتے اور پڑھاتے ہوں، اور برتاؤ کے بنیادی تقاضے بھی پورے نہ کرتے ہوں؟
۲۔ جو شخص خود کسی کام میں اچھا نہ ہو، کیا وہ دوسروں کو وہ کام سکھا سکتا ہے، ان کی تربیت کر سکتا ہے؟ میرے لیے دین بڑی حد تک عمل کا معاملہ ہے۔ تو کوئی شخص خود جس بات پر عمل نہ کرتا ہو، دوسروں کو وہ کیسے سکھا سکتا ہے؟
۳۔ یا پھر مجھے ہی اپنا زاویۂ نظر بدلنا چاہیے؟ انہیں تربیت کرنے والوں کے بجائے صرف پیغام پہنچانے والے سمجھوں؟ کیا پھر ان کے اپنے طرزِ عمل سے کوئی فرق نہیں پڑے گا؟
کئی دن انہی سوالوں میں الجھی رہی۔ پھر سوچا، ذرا ایک ایک بات الگ کر کے دیکھوں۔
میں نے یہ دیکھنا شروع کیا کہ پیغام پہنچانے والے اور تربیت کرنے والے کا کام کیا ہے، اور دونوں میں فرق کہاں ہے۔ اگر میں خود پیغام کھول کر نہ پڑھوں، اس پر غور نہ کروں، خود اسے سمجھنے کی کوشش نہ کروں، اور اصل الفاظ سے کم اور اس شخص کی سمجھ اور اس کے نکالے ہوئے نتائج سے زیادہ سیکھوں، تو میرے لیے وہ محض پیغام پہنچانے والا نہیں رہتا۔ وہ میرا رہنما بھی ہے، میری تربیت بھی کر رہا ہے۔ تب اس کا اپنا طرزِ عمل اہم ہو جاتا ہے۔
میری سمجھ میں بات یوں آ رہی تھی کہ پیغام پہنچانے والا بس پیغام آپ تک پہنچاتا ہے۔ وہ آپ کی طرف سے اس کی تعبیر نہیں کرتا۔ خود سوچے بغیر کسی پیغام کو سمجھنا چاہوں، تو دراصل میں اپنے حصے کا سوچنا کسی اور کے سپرد کر رہی ہوں۔ یہ دعویٰ کروں کہ میں سمجھنا چاہتی ہوں، مگر اس مطالعے کو نہ اپنا وقت دوں، نہ اپنی ذہنی محنت، تو یہ سستی بھی ہے اور بے ایمانی بھی۔
خیر، مجھے احساس ہوا کہ میں نے انہیں اچھی طرح پرکھے بغیر ہی ایک مقام دے دیا تھا۔ اور سچ تو یہ ہے کہ میں نے بھی کبھی اپنا وقت اور اپنی فکری صلاحیتیں پوری طرح یہ پڑھنے اور سمجھنے میں نہیں لگائی تھیں کہ اللہ سبحانہ وتعالیٰ کیا فرما رہے ہیں۔
سو میں نے طے کیا: اس بار قرآن پڑھوں گی، صرف قرآن۔ اسے ایک کتاب کی طرح پڑھوں گی، جیسے کوئی اور کتاب پڑھتی ہوں، اور دیکھوں گی کہ مصنف مجھ سے کیا کہنا چاہتا ہے۔
کوشش کروں گی کہ پہلے سے کوئی مفہوم ذہن میں لے کر نہ بیٹھوں۔ یوں پڑھوں جیسے اس کے بارے میں کچھ جانتی ہی نہ ہوں۔ جو تعریفیں اور دینی معلومات پہلے سے میرے پاس ہیں، انہیں فی الحال ایک طرف رکھ دوں۔ مدد لوں گی تو صرف عربی زبان کو سمجھنے کے لیے: لغات سے، صرف و نحو کی کتابوں سے، اور لفظوں کی اصل اور اشتقاق پر لکھی گئی کتابوں سے۔
مجھے تو اندازہ ہی نہیں تھا کہ یہاں جاننے کو اتنا کچھ ہے!